Падчас сустрэчы, якая адбылася 11 кастрычніка, актывісты Беларускай сацыял-дэмакратычнай партыі (Грамады) планавалі дзейнасць на бліжэйшы перыяд, а таксама абменьваліся думкамі з нагоды надыходзячых прэзідэнцкіх выбараў.

Лідар бабруйскіх сацыял-дэмакратаў Юрый Грынявецкі паведаміў, што ў Бабруйску актывісты дэмакратычных арганізацый прапанавалі механізм вылучэння адзінага кандыдата ў прэзідэнты ад дэмакратычных сіл, у адпаведнасці з якім у кожным горадзе Беларусі павінны адбыцца агульныя сходы апазіцыі, на якіх павінен быць вылучаны “адзіны” кандыдат ад рэгіёна. Па выніках падобных сходаў неабходна правесці Кангрэс, на якім з улікам рэгіянальных сходаў выбраць “адзінага” кандыдата ад усіх дэмакратаў. Гэта дасць магчымасць казаць, што кандыдата падтрымліваюць на рэгіянальным узроўне ва ўсёй краіне і ён сапраўды “адзіны”.

Сябра прэзідыума БСДП ад Магілёўскай вобласці Ігар Барысаў адзначыў, што на дадзены момант у вобласці няма адзінства дэмакратаў. Існуючая кааліцыя дэмакратычных сіл ужо даўно страціла сваю легетымнасць, а дзейнасць у межах гэтай кааліцыі ўжо не вядзецца некалькі год.

Таксама падчас сустрэчы сацыял-дэмакраты закранулі пытанні назірання за выбарамі, а таксама партыйнага рэкруцінга. Паводле звестак з Магілёва і Бабруйска пачаўся рост колькасці сябраў партыі. За апошні год шэрагі Грамады ў вобласці папоўнілі амаль 20 чалавек.

Акрамя таго, актывісты запланавалі шэраг супольных адукацыйных мерапрыемстваў, якія мусяць адбыцца ў самы бліжэйшы час.

Прэс-служба БСДП